ආණ්ඩුව කෙරෙහි ඇති ජනතා ප්රසාදය වේගයෙන් ඉහළට! නවතම සමීක්ෂණ වාර්තාවක් නිකුත් වෙයි!
වේරිටේ රිසර්ච් ආයතනය විසින් පවත්වනු ලබන “රට හිතන හැටි” (Mood of the Nation) නවතම මත විමසුමට අනුව, වත්මන් ආණ්ඩුව කෙරෙහි පවතින ජනතා අනුමැතිය 65%ක් දක්වා ඉහළ ගොස් තිබේ. 2026 පෙබරවාරි මුල් භාගයේ දත්ත අනුව මෙය වසරකට පෙර පැවති 62%ක අගයට සාපේක්ෂව ස්ථාවර මට්ටමක පවතින බව එම ආයතනය පවසයි.
මෙම මත විමසුමේ සිව් වසරක ඉතිහාසය තුළ ප්රථම වතාවට, මෙරට ආර්ථික තත්ත්වය “යහපත්” හෝ “විශිෂ්ට” ලෙස ඇගයූ පිරිස, එය “දුර්වල” ලෙස ඇගයූ පිරිස ඉක්මවා ගොස් තිබීම සුවිශේෂී වේ.
- ආර්ථික ඉදිරි දැක්ම: ආර්ථිකය යහපත් වෙමින් පවතින බව පවසන පිරිස 55% සිට 64% දක්වා ඉහළ ගොස් ඇත.
- ආර්ථික විශ්වසනීය දර්ශකය: මීට වසරකට පෙර +14ක් ලෙස සටහන් වූ මෙම දර්ශකය මෙවර +36ක් දක්වා කැපී පෙනෙන වර්ධනයක් පෙන්නුම් කරයි.
වසර හතරක මත විමසුම් ඉතිහාසය තුළ පළමු වතාවට, රටේ කටයුතු සිදුවන ආකාරය පිළිබඳව ජනතාව දක්වන තෘප්තිය 50% සීමාව ඉක්මවා ගොස් ඇත. වර්තමානයේ ජනතාවගෙන් 59%ක් රටේ ගමන් මඟ පිළිබඳව තෘප්තිමත් බව ප්රකාශ කර තිබේ.
රජයේ විවිධ අංශයන්හි ක්රියාකාරිත්වය ඇගයීමේදී, ජනතාවගෙන් වැඩිම ධනාත්මක ප්රතිචාර හිමිව ඇත්තේ මත්ද්රව්ය සහ අපරාධ අවම කිරීම සම්බන්ධයෙනි. දූෂණය අවම කිරීම සම්බන්ධයෙන් පවතින ඇගයීමට වඩා මෙය ඉහළ මට්ටමක පැවතීම විශේෂත්වයකි.
වැන්ගාඩ් සවේ (Vanguard Survey) ආයතනය මගින් 2026 ජනවාරි 24 සිට පෙබරවාරි 03 දක්වා කාලය තුළ මෙම දත්ත රැස්කර ඇත. දිවයින පුරා විසිරී සිටින වැඩිහිටියන් 1,048 දෙනෙකු ඇසුරින් සිදුකළ මෙම මත විමසුම 95%ක විශ්වාසනීය මට්ටමක පවතින බව වේරිටේ රිසර්ච් ආයතනය සඳහන් කරයි.
